• Printable version

Procesi I Azilit

Procesi i azilit do të përcaktojë nëse ju jeni refugjat apo jo. Nëse deklaroheni refugjat, do të keni disa të drejta, duke përfshirë të drejtën për të jetuar në Irlandë, të drejtën që anëtarë të caktuar të familjes të jetojnë me ju dhe të drejtën për të punuar.

Formulari i Aplikimit
Ju kërkohet të plotësoni një formular aplikimi që ju jepet nga Zyra e Komisionerit të Aplikimeve për Refugjat. Tashmë, këtë mund ta keni bërë. Ky dokument është baza e kërkesës suaj për azil dhe ka shumë rëndësi të tregoni me hollësi në dokument për arsyet përse u larguat nga vendi juaj. Më pas, do t’ju kërkohet ta dorëzoni formularin e aplikimit në Zyrën e Komisionerit të Aplikimeve për Refugjat. Është e këshillueshme që të regjistroheni në Shërbimin Ligjor për Refugjatët përpara se ta plotësoni këtë pyetësor. Nëse Zyra e Komisionerit të Aplikimeve për Refugjat beson se ju keni aplikuar më parë për azil në një shtet tjetër të Bashkimit Evropian, ajo do të kërkojë që autoritetet e atij shteti të konfirmojnë nëse kanë të regjistruar apo jo një person me shenjat tuaja të gishtërinjve. Nëse gjenden një palë shenjash gishtërinjsh që korrespondojnë me tuajat, ka mundësi që të tentojnë t’ju transferojnë në atë shtet, pa e shqyrtuar kërkesën tuaj për azil. Do t’ju jepet mundësia për të apeluar, nëse vjen kjo situatë.

Intervista
Kur Zyra e Komisionerit të Aplikimeve për Refugjat të jetë gati për t’u marrë me aplikimin tuaj, ajo do t’ju thërrasë për intervistë. Ju do të intervistoheni dhe, nëse është e nevojshme, duhet të jetë i pranishëm një përkthyes. Intervistuesi do të bëjë pyetje në bazë të informacionit që gjendet në formularin e aplikimit tuaj. Sërish, është me rëndësi që ju të bëni një përshkrim të tërësishëm të arsyeve për të cilat latë vendin tuaj dhe për të cilat nuk mund të ktheheni atje. Informacioni që lihet jashtë formularit të aplikimit ose intervistës nuk mund të merret parasysh nga Komisioneri i Aplikimeve për Refugjat kur të merret vendimi nëse ju duhet të deklaroheni refugjat apo jo. Është jetike që ju të tregoni historinë e plotë, në vend që të prisni t’ju pyesë intervistuesi. Në fund të intervistës, shënimet e intervistës do t’ju lexohen dhe do t’ju kërkohet t’i nënshkruani për të konfirmuar që janë të sakta. Juve do t’ju jepet një kopje e intervistës dhe do t’ju rekomandonim që t’i jepni menjëherë një kopje Shërbimit Ligjor për Refugjatët. Pas intervistës, keni shtatë ditë pune kohë për t’i dorëzuar Zyrës së Komisionerit të Aplikimeve për Refugjat deklarata të mëtejshme me shkrim, nëse dëshironi. Intervistuesi mund t’ju kërkojë që, brenda një afati kohor të caktuar, të paraqisni dokumenta ose informacione. Çdo dokument që mund të siguroni në mbështetje të kërkesës suaj për azil mund të jetë një ndihmë e madhe.

Vendimi i Komisionerit të Aplikimeve për Refugjat
Pas shtatë ditë pune, Komisioneri i Aplikimeve për Refugjat do të marrë vendimin nëse të rekomandojë që ju të deklaroheni refugjat. Gjatë marrjes së këtij vendimi, Komisioneri i Aplikimeve për Refugjat merr në konsideratë përkufizimin e refugjatit.
Neni 2 i Ligjit të Refugjatit 1996 parashikon që refugjat është:

“Një person i cili, në sajë të frikës së bazuar se persekutohet për arsye të racës, fesë, kombësisë, anëtarësisë në një grup shoqëror të caktuar ose opinionit politik, është jashtë shtetit të vet dhe nuk është në gjendje, ose, për shkak të kësaj frike, nuk do të përfitojë nga mbrojtja e atij shteti.

Nëse Komisioneri i Aplikimeve për Refugjat rekomandon që ju të deklaroheni refugjat, kjo do t’ju thuhet në letër. Pastaj, duhet t’ju vijë letër nga Ministria e Drejtësisë, Barazisë dhe Reformës Ligjore që ju tregon të drejtat tuaja. Nëse vendimi është negativ, edhe kjo do t’ju thuhet në letër dhe do të keni ose dhjetë (10) ose pesëmbëdhjetë (15) ditë pune kohë që nga data e letrës për të apeluar, nëse doni ta bëni këtë. Do të keni dhjetë ditë pune kohë nëse çështja juaj është dukshëm e pabazuar. Në rast të kundërt, do të veprojë kufiri kohor prej 15 ditë pune. Këta janë kufij kohorë striktë. Nëse merrni një letër refuzimi nga Zyra e Komisionerit të Aplikimeve për Refugjat, duhet të kontaktoni menjëherë Shërbimin Ligjor për Refugjatët.

Apeli në Tribunalin e Apelit për Refugjatët
Nëse apeloni dhe kërkoni një seancë gojore, kjo seancë do të mbahet përpara Tribunalit të Apelit për Refugjatët. Seanca gojore nuk do t’ju ofrohet nëse Komisioneri i Aplikimeve për Refugjat ka vendosur që çështja juaj është dukshëm e pabazuar. Nëse kjo ndodh, apeli juaj do të vendoset në bazë të dokumentave që do t’i dërgohen Tribunalit në emrin tuaj. Apeli gojor është ndryshe nga intervista me Zyrën e Komisionerit të Aplikimeve për Refugjat. Në vend që të intervistoheni, fillimisht, ju do të merreni në pyetje nga këshilltari juaj ligjor dhe, më pas, do të merreni në pyetje nga një përfaqësues i Zyrës së Komisionerit të Aplikimeve për Refugjat. Anëtari i Tribunalit të Apelit për Refugjatët, që është personi që dëgjon apelin dhe që merr vendimin, gjithashtu mund t’ju marrë në pyetje.

Vendimi i Tribunalit të Apelit për Refugjatët
Anëtari i Tribunalit të Apelit për Refugjatët normalisht do të lëshojë vendimin brenda disa javëve që nga data e seancës. Vendimi do të jetë ose të rekomandohet që ju të jeni refugjat, ose jo. Nëse vendimi i Tribunalit të Apelit për Refugjatët është pozitiv, kjo do t’ju thuhet në letër. Po ashtu, do t’ju vijë një letër nga Ministria e Drejtësisë, Barazisë dhe Reformës Ligjore që t’ju informojë për të drejtat tuaja. Nëse vendimi është refuzim, Tribunali i Apelit për Refugjat do t’ju njoftojë për këtë në letër.

Refuzimi i Statusit të Refugjatit
Nëse ju është refuzuar statusi i refugjatit pas apelit dhe ky vendim nuk mund të kundërshtohet, ka të ngjarë që t’ju vijë një letër nga Ministria e Drejtësisë, Barazisë dhe Reformës Ligjore për t’ju thënë se Ministri ka ndërmend t’ju kthejë mbrapsht. Do t’ju jepen tre mundësi, që janë:
1. T’i paraqisni Ministrit brenda pesë ditësh pune arsyet që sqarojnë përse duhet t’ju lejohet juve të qëndroni në këtë shtet;
2. Të largoheni nga ky shtet përpara se Ministri të vendosë mbi këtë çështje dhe të informoni Ministrin me shkrim për masat që keni marrë për këtë qëllim;
3. Të bini dakort për marrjen e urdhërit të deportimit brenda 15 ditë pune.

Ekziston një kufi kohor strikt prej 15 ditë pune brenda të cilit duhet bërë aplikimi për leje qëndrimi.

Urdhëri i Deportimit
Nëse nuk deklaroheni refugjat, ose nuk ju jepet leje qëndrimi ose nuk zgjidhni të riatdhesoheni vullnetarisht do t’ju jepet një Urdhër Deportimi. Nëse ju është dhënë një urdhër deportimi, në të ardhmen mund të keni probleme nëse tentoni të hyni në ndonjë shtet anëtar të BE.